دنيا سمير غانم: "جت سليمة" مشروع كبير تعبنا فيه

قامت الفنانة دنيا سمير غانم  بتوجيه الشكر إلى أبطال مسلسل "جت سليمة"، والذي عرض في السباق الرمضاني المنقضي، وحقق نجاحًا كبيرًا، كما وجهت الشكر لزوجها وأبنتها كايلا.
وكتبت دنيا عبر حسابها بموقع تبادل الصور والفيديوهات انستجرام: مشروع كبير تعبنا فيه جداً عشان نقدر نعمل حاجة تسعدكم..  شكراً للمنتج محمد أحمد السبكي الشاطر جدا اللي مش بيسيب ولا تفصيلة صغيرة غير لما يكون مطمن انها متنفذة على أكمل وجه.. وشكرا علي مجهودك الكبير و اهتمامك.
وتابعت: شكراً المنتج الكبير "الأب" أحمد السبكي اللي بيحب الفن حب غير عادي و نفسه دايما انه يقدم أعمال تعجب الناس، شكرا ل كريم و خالد السبكي، ربنا يخليكوا لبعض.
ووجهت شكرًا للفنان محمد سلام وقالت: شكرا محمد سلام اللي فعلا بستمتع وانا بمثل معاه لإن تمثيله و إفيهاته و إحساسه out of the box، و أعتقد بيبان عليا كل مرة بنشتغل مع بعض.
وأضافت: شكرا استاذ خالد الصاوي الجامد أكتر ممثل عنده ضمير في الدنيا و تفاني في العمل غير طبيعي، انا فعلا بتفرج عليك و بتعلم و بسرح في أدائك العبقري اللي فيه الجد ممزوج بالهزار بدرجة مظبوطة جدا، شكرا سامي مغاوري الفنان القدير السهل الممتنع اللي وجوده بيضيف إضافة غير طبيعية، ربنا يديك الصحة.
واستكملت: شكرا استاذة هالة فاخر الراقية، قدمت شخصية بإبهار شديد و بتميز ، كل مشهد ليكي بيحسسني بسعادة ك مشاهدة من قبل حتي ما تتكلمي، شكرا محمد ثروت،، انت عملت الشخصية بطريقة جديدة و بخفة دم فظيعة كالعادة، وشكرا للقديرة المتمكنة جدا جدا جدا سلوي خطاب، نورتينا و وصلتي رسالة عظيمة من خلال إتقانك لشخصيتك و استحملتي الميك اب الصعب ده لعدد ساعات طويل جدا في سبيل انك تعملي الشخصية كويس.
كما وجهت الشكر للفنانة سلوى محمد علي وقالت: شكرا للقديرة سلوي محمد علي أدائك ل أم العريف غير متوقع و مش كليشيه تماما، أول مرة أحس ان الساحرة او ال witch قريبة مننا كده و انسانة عادية لكن عندها قدرات و شر و في نفس الوقت هزار، حقيقي أمتعتينا، شكرا للجميلة رحاب الجمل، كنتي لذيذة جدا بجد و انا سعيدة اوي اني اشتغلت معاكي لإني من معجبينك.
وأضافت: شكرا مايان السيد الموهوبه جدا البسكوتة المجتهدة اللي تدخل القلب في ثواني، عندك قبول فظيع ما شاء الله و ذكاء في التمثيل بيخليكي مميزة جدا و انا شخصيًا حبيتك أكتر لما اشتغلت معاكي ربنا يوفقك يا حبيبتي، شكرا للحلوين كيمز وصلاح الدالي انتوا فعلا أثبتوا ان الكوميديان ممكن يثبت نفسه في أي مشهد حتي لو مساحة الدور أقل من قدراته، وشكرا الطفل ادم النحاس "عمر" انت بجد ما شاء الله موهوب اوي و فنان اوي و صوتك حلو اوي اوي اوي ما شاء الله والطفل ادم نور "رعد" انت شاطر اوي و أقنعتني أوي في الأول و بعد ما اتغيرت كمان برافو عليك.
وتابعت: شكرا للفنان الكبير اللي انا بعشقه و ماقدرش اكون في عمل هو مش فيه، بيومي فؤاد انت أضافتلنا الكوميديا بتاعتك اللي ماحدش بيعرف يعملها غيرك.. عملتلنا نعنشة في المسلسل.
كما وجهت شكر لضيوف الشرف في المسلسل وقالت: شكرا للنجوم ضيوف الشرف الكبار اوي اللي بجد نورونا و ماحدش اتردد فيهم لحظة واحدة و كلهم جايين مش فارق معاهم حتي ايه الدور اللي هيعملوه او مساحته أد ايه
هم بس جم عشان يقفوا جنبنا.
وأضافت: جينا بقي للثلاثي اللي حققلي أحلامي في الأغاني سواء في مسرحية آنستونا او في مسلسل جت سليمة شكرا للشاعر الجامد ايمن بهجت قمرانا مش عارفة اقول لك ايه بجد ازاي ما شاء الله بتترجم معني الأغنية اللي مطلوبة منك بسلاسة و تميز و في نفس الوقت مفردات جديدة و قريبك مننا كلنا ما شاء الله عليك
واستكملت: شكرا للملحن المميز جدا عمرو مصطفي اللي بيتميز برقي رهيب في الألحان حتي لو بيلحن أغنية شعبية التفوق مش جديد عليك شكرا للموزع الجامد نابلسي اللي بيبَروِز اللحن و الكلام بطريقة خطيرة و متنوعة في كل أغنية شكرا مهندس الصوت احمد جمال.
كما وجهت شكرًا لجمهورها وقالت:  شكرا للجمهور العظيم اللي بعد كل عمل بيثبتلي إن ليا أهل في كل البيت الحمد لله و بيخليني أعمل أقصي ما عندي عشان اكون عند حسن ظنكم.
وأضافت: شكرا لـ جوزي وحبيبي رامي رضوان اللي دايما بيدعمني و بيفرح لنجاحي.
واختتمت دنيا حديثها بتوجيه رسالة إلى أبنتها كايلا وقالت: وأخيرا بقي شكرا لروح قلبي و حياتي نجمتي الصغننة اللي نورتني و أبهرتني أنا شخصيا ما شاء الله ربنا يحفظك يا قلبي و يكتبلك الخير و السعادة انت و كل أطفالنا و يا رب مستقبلكم يكون منور و حظكم أحسن مننا يا رب